Markmiðið í Reykjadal er að bjóða upp á fjölbreytt tómstundartækifæri þar sem börn og ungmenni fá að njóta sín á eigin forsendum. Vinátta og gleði er mikilvægur þáttur í starfseminni þar sem áhersla er lögð á að öll geti eignast vini og séu fremst á meðal jafningja. 

Frá 1963 hefur Styrktarfélag lamaðra og fatlaðra rekið sumarbúðir í Reykjadal í Mosfellsdal. Boðið er upp á sumar- og helgardvalir fyrir fötluð börn og ungmenni í Mosfellsdal allt árið um kring. Auk þess er boðið upp á Ævintýrabúðir fyrir börn með ADHD, einhverfu og andlegar áskoranir og fjölbreytta samveru og jafningastuðning fyrir ungt fatlað fólk og fjölskyldur þeirra. Alls nýta sér um 400 börn og ungmenni úrræði á vegum Reykjadals ár hvert. 

Sund og leikur hefur lengi verið mikilvægur liður í dvölinni í Reykjadal og er sundlaugin ómissandi hluti af upplifuninni. Nú þarf sundlaugin okkar verulega á viðgerðum að halda og söfnum við fyrir því að koma sundlauginni í stand svo að hægt sé að skemmta sér áfram og búa til góðar minningar.