Frá árinu 1956 hefur Gló stuðningsfélag rekið Gló Æfingastöð, miðstöð þjónustu og þekkingar í snemmtækri íhlutun og endurhæfingu fyrir börn og ungmenni. Þar starfar öflugt teymi sjúkraþjálfara, iðjuþjálfa og aðstoðarfólks sem býr yfir víðtækri reynslu af starfi með börnum, ungmennum og fjölskyldum þeirra.

Þjónustan byggir á fjölskyldumiðaðri nálgun þar sem áhersla er lögð á þátttöku, styrkleika og vellíðan barnsins í daglegu lífi. Unnið er í nánu samstarfi við fjölskyldur, skóla, leikskóla og aðra fagaðila til að tryggja samræmdan og markvissan stuðning. Þjónustan getur falist í þjálfun, ráðgjöf, aðlögun umhverfis, útvegun hjálpartækja og öðrum úrræðum sem styðja við þroska og þátttöku.

Árlega nýta tæplega 1.800 einstaklingar þjónustu Gló Æfingastöðvar, þar af eru um 94% börn og ungt fólk með fjölbreyttar stuðningsþarfir og áskoranir.

Markmið starfseminnar er að efla þátttöku barna, ungmenna og fatlaðs fólks í daglegu lífi, styrkja sjálfstæði og auka lífsgæði einstaklinga og fjölskyldna þeirra. Með snemmtækum stuðningi, þekkingu og samstarfi leggur Gló Æfingastöð grunn að auknum tækifærum og farsælli framtíð.