Magnús Máni sonur minn hefur verið í mjög krefjandi endurhæfingu og lagt gríðarlega mikið á sig sem skilað hefur góðum árangri en Magnús veiktist alvarlega árið 2023 og missti allan mátt fyrir neðan bringu. Endurhæfingin hefur verið mjög fjölbreytt og yndislegt fólk bæði heima á Íslandi sem og erlendis hefur komið að henni og fyrir það er ég ævinlega þakklát.

Íslenska ríkið hefur tekið ákvörðun um að útvega ekki bestu mögulegu endurhæfingu fyrir fólk sem glímir við taugaraskanir og höfum við fjölskyldan því þurft að leita erlendis til að fá bestu mögulegu endurhæfingu sem í boði er í heiminum í dag fyrir Magnús Mána. Þrátt fyrir að það sé skylda ríkisins að útvega bestu heilbrigðisþjónustu sem völ er á, samkvæmt Barnasáttmála Sameinuðu Þjóðanna, hefur ríkið aðeins tekið þátt í kostnaðinum af litlum hluta.

Magnús hefur nú þegar verið í endurhæfingu í samtals 23 vikur í Madríd yfir eins og hálfs árs tímabil og munu bætast við rúmar 3 vikur í júlí-ágúst 2026. Kostnaðurinn við hverja viku í Madríd er rúm ein milljón króna þannig að í lok sumars verður kostnaður við endurhæfinguna í Madríd kominn upp í tæpar 30 milljónir króna til viðbótar við annan kostnað.

Ég hleyp þess vegna til að styðja við áframhaldandi endurhæfingu Magnúsar Mána og að hann geti áfram notið bestu endurhæfingar sem völ er á.

Takk innilega fyrir stuðninginn❤️🙏