Í ár hleypur Bríet Klara í Reykjavíkurmaraþoninu.

Fyrir rúmu ári síðan breyttist lífið okkar á einu augnabliki þegar Bríet greindist með krabbamein, aðeins 14 ára gömul. Síðan þá hefur hún gengið í gegnum aðgerðir, lyfjameðferðir, geislameðferðir, ótal rannsóknir, spítalainnlagnir og endalausa bið eftir niðurstöðum. Hún hefur misst af stórum stundum í lífi unglingsins, verið langt frá vinum sínum og þurft að takast á við hluti sem engin ung manneskja ætti að þurfa að upplifa.

Samt hefur hún mætt hverri áskorun af ótrúlegu hugrekki. Hún hefur kennt okkur sem í kringum hana erum hvað raunverulegur styrkur er. Á dögum sem voru þungir fann hún enn ástæðu til að brosa, hlæja og halda í vonina.

Þess vegna er svo sérstakt að sjá hana núna skrá sig í Reykjavíkurmaraþonið. Að sjá hana aftur á körfuboltavellinum, með vinum sínum og hlaupa inn í framtíðina með drauma og markmið. Það eru hlutir sem við munum aldrei aftur taka sem sjálfsagða.

Bríet hleypur til styrktar Börnum með krabbamein – styrktarfélagi. Félaginu sem studdi okkur á þeim tíma þegar við þurftum mest á því að halda og hjálpar fjölskyldum að takast á við eitt erfiðasta verkefni sem foreldrar geta staðið frammi fyrir.

Ef þú hefur tök á að heita á Bríeti yrðum við af öllu hjarta þakklát. Hvert framlag skiptir máli💗🥳