Ég ætla að hlaupa hálft maraþon í Reykjavíkurmaraþoni Íslandsbanka í ágúst næstkomandi til styrktar Ljósinu. Ég hef áður hlaupið fyrir Ljósið og styrkt sjálf með framlagi um nokkurra ára skeið. Í ár er mér starfsemin sérstaklega hugleikin, þar sem Hildur systir mín greindist nýlega með brjóstakrabbamein, 42 ára gömul. Meinið uppgötvaðist i hefðbundinni brjóstaskimun.  

Systir mín hefur tekist á við þessi óvæntu veikindi af miklu hugrekki, styrk og jákvæðni. Hún hefur mest verið að leita í Ljósið til að byggja sig upp andlega og líkamlega, en eins og hún segir sjálf þá á hún ekki nægilega sterk orð til að lýsa því góða og flotta starfi sem þar er unnið.  

Í Ljósinu hefur hún fengið ómetanlega góðar móttökur frá starfsfólki, fengið jafningjastuðning, ýmsa fræðslu, nýtt sér íþróttasalinn og sótt í annað frábært starf sem Ljósið hefur upp á að bjóða. Jafnframt fengum við nánasta fjölskyldan mjög góðan viðtalstíma og fræðslu í Ljósinu í upphafi greiningar, auk þess sem önnur fræðsla stendur reglulega til boða fyrir aðstandendur. Ég á einnig mjög góða vinkonu sem greindist í lok síðasta árs og er í sömu sporum og systir mín -  ég hleyp hálft maraþon fyrir hetjurnar mínar og gott málefni.  Ég hvet fjölskyldu, vini mína og vandamenn að heita á mig með því að styrkja starfsemi Ljóssins.

Með fyrirfram þökk og kærleikskveðju,

Ingibjörg Ásta