Við hlaupum fyrir Kraft og Hlynsa okkar sem hefur verið í baráttu við bráðahvítblæði í 6 ár.

Hlynur greindist fyrst árið 2018, þá 25 ára gamall og hefur þurft á þeim tíma að ganga í gegnum ótrúlegan ólgusjó. Hann hefur endurgreinst, legið á gjörgæslu, þurft að fara í  beinmergsskipti (stofnfrumuskipti) í Svíþjóð tvisvar sinnum á nokkrum mánuðum og hefur þurft að einangra sig vegna sýkingahættu lengur en flest okkar hefðu þolað. 

Hlynur fékk ekki merg frá gjöfum sem pössuðu fullkomlega þar sem enginn var á skrá fyrir hann sem passaði alveg. Ef beinmergur virkar ekki eins og hann á að gera þá getur það orðið til þess að engar varnir verði gegn sjúkdómnum ömurlega og almennar sýkingar verða meiriháttar mál eins og Hlynur hefur því miður þurft að upplifa. Með því að hlaupa saman viljum við hvetja sem flesta til að skoða þann möguleika að skrá sig sem gjafi hjá Blóðbankanum ásamt því að styrkja Kraft. Í gegnum allan þennan tíma hefur Kraftur staðið þétt við bakið á honum og okkur aðstandendum. Nú viljum við gefa aðeins til baka og vonum að sem flestir vilji taka þátt í því fyrir hönd Hlynsa okkar mesta og besta!

Áfram Kraftur og áfram ALLTAF HLYNSI !

P.s. Úúú á skítblæði!