Ég hleyp 10 km í Reykjavíkurmaraþoni Íslandsbanka á laugardaginn, ef mjöðmin og kálfinn halda, og safna fyrir Slysavarnafélagið Landsbjörg. Félagið fjármagnar sig að stærstum hluta með flugeldum og spilakössum, hjá sumum einingum allt að 90%, og mitt mat er að báðir þessir tekjustraumar muni taka töluverðum breytingum á næstu fáu árum. Starfsemin verður hins vegar jafn nauðsynleg og áður.

Markmiðið mitt er að safna 50.000 kr. og ég set 10.000 inn sjálfur. Ef þú kaupir rökin mín hér að neðan væri frábært ef þú gætir heitið eins og einum kaffibolla, 500 kr.

Undir Slysavarnafélaginu starfa 93 björgunarsveitir, 33 slysavarnadeildir og 48 unglingadeildir með um 18.000 félögum, langflestum í sjálfboðastarfi, og þar af eru um 4.000 tilbúnir í útkall allan sólarhringinn, allt árið um kring.

Verksviðið nær frá leit að týndu fólki og björgun úr snjóflóðum yfir í sjóbjörgun á 13 björgunarskipum, fyrsta viðbragð við umferðarslysum í dreifbýli og gæslu við eldgos. Þá rekur félagið bæði Slysavarnaskóla sjómanna og hálendisvakt yfir sumarmánuðina. Í fyrra mættu 2.265 björgunarmenn alls 9.760 sinnum í útköll.

Augljósa lausnin væri að rukka þá sem bjargað er, en sveitirnar hafna henni sjálfar á þeirri forsendu að sá sem hikar við að hringja verði stærra og dýrara verkefni nokkrum tímum síðar.

Ríkið kaupir tilteknar þjónustur af félaginu samkvæmt samningi en borgar ekki fyrir sveitirnar sjálfar. Þær eru fjárhagslega sjálfstæðar og kaupa sína bíla, báta, hús og þjálfun sjálfar.

Þrýstingurinn á báða tekjustrauma er réttmætur, enda segir Umhverfis- og orkustofnun að flugeldar séu aldrei umhverfisvænir eða skaðlausir. Bann við spilakössum hefur farið fyrir Alþingi á fimm þingum í röð, landlæknir styður það og einn eigenda kassanna gekk út árið 2021 og sagði traust vega þyngra en peningana.

Landsbjörg bendir sjálft á að bann við spilakössum myndi að mestu flytja tekjurnar á erlendar netsíður. Það er rétt, en það breytir ekki því hvert stefnir. Árið 2023 bannaði enska úrvalsdeildin veðmálafyrirtæki framan á keppnistreyjum og á tímabilinu sem nú er hafið eru þau öll horfin.

Félagið er þegar byrjað að bregðast við, selur rótarskot með Skógræktarfélagi Íslands í stað rakettna og byggir upp hóp fastra styrktaraðila. Ég hleyp fyrir Landsbjörg vegna þess mikilvæga starfs sem félagið sinnir og til að stuðla að umræðu um nýja tekjustrauma fyrir starfsemina.