Þann 22. ágúst ætla ég að hlaupa hálfmaraþon í Reykjavíkurmaraþoninu með það að markmiði að safna áheitum fyrir Magnús Mána og fjölskyldu hans.

Magnús Máni er ungur strákur sem veiktist alvarlega sumarið 2023 þegar hann fékk bakteríusýkingu með þeim afleiðingum að hann missti máttinn fyrir neðan bringu. Þegar þetta gerðist fengu Magnús og fjölskylda hans þau erfiðu skilaboð að hann myndi ekki ganga aftur.

Fyrir Magnús Mána og fjölskyldu hans var uppgjöf hins vegar aldrei í boði og hafa þau unnið þrotlaust að endurhæfingu Magnúsar, sem hefur náð ótrúlegum framförum.

Ég hef fylgst með Magnúsi Mána og hans mögnuðu fjölskyldu, Magnúsi, Sibbu, Þórhildi og Brynhildi, takast á við þetta verkefni. Með ótrúlegum viljastyrk, þrotlausum æfingum og mikilli vinnu hefur Magnús Máni náð árangri sem fáir hefðu þorað að vona.

Þau sem vilja kynna sér sögu þeirra betur geta skoðað fréttina hér að neðan. Þar má meðal annars sjá ótrúlega stund frá Reykjavíkurmaraþoninu í fyrra þegar drengurinn, sem hafði fengið þau skilaboð að hann myndi ekki ganga aftur, gekk sjálfur yfir marklínuna

https://www.visir.is/g/20252765800d/til-finningathrungin-stund-thegar-magnus-mani-kom-i-mark

Þessi árangur hefur þó ekki komið án kostnaðar. Í þessari vegferð hefur fjölskyldan þegar lagt út hátt í 30 milljónir króna vegna endurhæfingar Magnúsar.

Mig langar því að leggja mitt af mörkum og ætla að hlaupa 21,1 km til að safna fyrir áframhaldandi vegferð Magnúsar Mána.

Ég yrði ótrúlega þakklátur ef þið sæjuð ykkur fært að styrkja söfnunina. Öll framlög skipta máli ❤️

Og ég get lofað ykkur einu, þetta verður ekkert skemmtiskokk. Ég ætla að gefa mig allan í hlaupið! 🏃‍♂️