Í ár ætla ég að hlaupa í Reykjavíkurmaraþoninu til að safna áheitum fyrir fjármögnun á endurhæfingu fyrir Magnús Mána, 15 ára drengs sem veiktist alvarlega eftir stutt veikindi sumarið 2023. Bakteríusýking náði alla leið inn í mænuna sem hafði þær afleiðingar að Magnús Máni lamaðist frá bringu og niður.

Frá þeim tíma hefur hann verið í gríðarlega mikilli og krefjandi endurhæfingu með það markmið að ná sér að fullu. Magnús Máni hefur náð miklum árangri en því miður hefur íslenska heilbrigðiskerfið ekki upp á að bjóða bestu aðstöðu og þjónustu hvað varðar endurhæfingu sem hann þarf á að halda. Fjölskyldan hefur því þurft að leita til erlendra aðila en því fylgir mikill kostnaður. Þátttaka Sjúkratrygginga Íslands er því miður aðeins lítið brot af þeim mikla kostnaði við þessa nauðsynlegu endurhæfingu Magnúsar og þess vegna hleyp ég fyrir Magnús Mána þann 23. ágúst 2025.

Vonandi get ég með ykkar stuðningi lagt eitthvað að mörkum til að styðja við Magnús Mána og fjölskylduna hans í þessari mikilvægu baráttu. 

Hvert framlag skiptir máli❣️